“Azərişıq ASC - Abonentin geniş tarixçəsinin verilməsi" xidməti artıq "mygov" platformasına inteqrasiya olunub.

Vətəndaşlar bu xidmət vasitəsilə elektrik enerjisi sərfiyyatı, borcu, limiti, ödənişləri və digər məlumatları əks etdirən tarixçəni elektron sənəd formasında əldə edə bilərlər.

Qeyd edək ki, sözügedən xidmətin “mygov” platformasına inteqrasiyası İnnovasiya və Rəqəmsal İnkişaf Agentliyi və Azərişıq ASC-nin birgə əməkdaşlığı ilə baş tutub.

Xidmətdən istifadə qaydası aşağıdakı kimidir:

• İstifadəçi adına olan abonent kodunu seçir və ya daxil edir.

• "Yoxla" düyməsinə klik edilir və daxil edilmiş kod əsasında ad, soyad və ata adı məlumatları sistemdə əks olunur.

• İstifadəçi əlaqə nömrəsini və elektron poçt ünvanını (istəyə bağlı olaraq) qeyd edir.

• Əlavə qeydlər olduğu təqdirdə daxil edilir.

• "Göndər" düyməsinə klik edərək sorğunu tamamlayır.

• Sorğu Azərişıq ASC-yə göndərilir.

• Müraciətin statusu “mygov” platformasında tamamlandıqdan sonra vətəndaş elektron arayışı "Tarixçə" bölməsindən əldə edə bilər.

Bu yeni xidmət vətəndaşlara enerji sərfiyyatı və ödəniş tarixçəsini vaxt itirmədən, fiziki ofislərə müraciət etmədən, elektron sənəd formasında rahat, şəffaf və sürətli şəkildə əldə etməyə imkan verir.

Əlavə məlumat üçün: www.mygov.az