Xəbərlər

İnnovasiya və Rəqəmsal İnkişaf Agentliyi (İRİA) və “Xsolla” şirkətinin tərəfdaşlığı ilə rəqəmsal oyun yaradıcıları üçün “Xsolla–IDDA Incubation Program” - inkubasiya proqramının təqdimatı baş tutub. Azərbaycanda ilk dəfə keçirilən bu proqramın məqsədi qabaqcıl beynəlxalq təcrübə və mentor dəstəyini ölkəmizə gətirməklə yüksək potensialı olan yerli oyun studiyalarının inkişafına təkan verməkdir. Üç aylıq hibrid proqramda seçim mərhələsini uğurla tamamlamış 10 oyun studiyası iştirak edəcək və proqram ərzində mükəmməl nəticə göstərən üç oyun studiyası 50, 75 və 100 min manatlıq pul mükafatı alacaq. 

İnkubasiya proqramının Azərbaycan İnnovasiya Mərkəzində keçirilən təqdimat mərasimində oyun ekosisteminin təmsilçiləri, tanınmış texnologiya blogerləri, “Xsolla” şirkətinin nümayəndələri, RİNN yanında İctimai Şuranın üzvləri və digər qonaqlar iştirak edib. Tədbir iştirakçılarını açılış nitqi ilə salamlayan “Xsolla Founding”in əməliyyatlar üzrə rəhbəri Paraaq Amin şirkətin Azərbaycana yatırım qərarının ölkəmizdə oyun sektorunda müşahidə edilən dinamik inkişafla birbaşa əlaqəli olduğunu bildirib. “Azərbaycanda oyun tərtibatçılarının yaratdığı layihələr və onların qlobal tədbirlərdə tanınması bu ölkədəki potensialdan xəbər verir. Biz də qlobal şirkət olaraq məhz burada Qafqaz və Mərkəzi Asiya üçün regional ofisimizi açmaq qərarına gəldik”, - deyə o qeyd edib.

Daha sonra İRİA-nın sədr müavini Rəşad Xalıqov çıxış edərək tədbir qonaqlarını Agentliyin innovasiya ekosisteminin inkişafı istiqamətində həyata keçirdiyi fəaliyyət haqqında məlumatlandırıb. Çıxışında R. Xalıqov oyun sənayesi kimi kreativ sahənin ölkə iqtisadiyyatı üçün yüksək potensialı olduğunu vurğulayıb: “Oyun yaradıcılığı sadəcə bir əyləncə deyil, həm də biznes və müasir texnologiyaların kəsişdiyi sahədir. Azərbaycanda da son illərdə oyun sənayesinin inkişafında güclü dinamika müşahidə edilir, oyun studiyalarının sayı artıq 60-dan çoxdur və İRİA olaraq biz bu ekosistemi davamlı dəstəkləyirik”.

“Xsolla” şirkətinin regional icraçı direktoru Fuad Kərimov regional ofisin fəaliyyəti, xüsusilə də yaxın gələcəkdə açılması planlaşdırılan “Xsolla StarNest Academy” haqqında ətraflı məlumat verib. O bildirib ki, bu mərkəz ölkəmizdə mobil, kompüter, konsol, onlayn və digər formatlarda yerli oyun tərtibatçıları üçün təlimlər həyata keçirəcək. Bu təlimlərə aparıcı qlobal ekspertlər cəlb ediləcək.

Tədbirin növbəti hissəsində inkubasiya proqramının gedişatı, tarixlər və formatı haqqında məlumat  diqqətə çatdırılıb. Seçilmiş 10 oyun studiyası layihə təqdimatlarını nümayiş etdirib və qonaqların sualları cavablandırılıb.

Qeyd edək ki, “Xsolla” qlobal oyun biznesində fəaliyyət göstərən kommersiya platformasıdır və bu sahədə 20 illik təcrübəyə sahibdir. İRİA ilə bu şirkətin əməkdaşlığı çərçivəsində yerli oyun ekosisteminin inkişafına yönəlmiş inkubasiya proqramı, “Xsolla StarNest Academy” və digər ortaq layihələr həyata keçirilir.