Beynəlxalq Universitetlərarası Proqramlaşdırma Müsabiqəsinin 49-cu dünya finalı çərçivəsində mətbuat konfransı baş tutub.
Bu gün Bakı Konqress Mərkəzində Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalı çərçivəsində mətbuat konfransı keçirilib. Tədbir yerli media nümayəndələrinin, tərəfdaş qurumların və təşkilatçıların iştirakı ilə baş tutub.
Mətbuat konfransının əsas məqsədi yarışmanın Bakıda təşkil olunmasının əhəmiyyətini ictimaiyyətə çatdırmaq, tərəfdaşların rolunu təqdim etmək və media nümayəndələrinin suallarını cavablandırmaq olub. Açılış nitqləri ilə ADA Universitetinin prorektoru Fariz İsmayılzadə və ICPC-nin icraçı direktoru, Baylor Universitetinin professoru Bill Pauçer çıxış ediblər.
Konfrans zamanı medianın suallarını ADA Universitetinin prorektoru Fariz İsmayılzadə, ICPC-nin icraçı direktoru, Baylor Universitetinin professoru Bill Pauçer, Azərbaycan Respublikası Mərkəzi Bankının sədrinin müavini Vüsal Xəlilov, İnnovasiya və Rəqəmsal İnkişaf Agentliyinin İdarə heyətinin sədr müavini Şahin Əliyev, “Huawei” şirkətinin baş redaktoru Allen Gavin, “OpenAI” şirkətinin tədqiqatçısı Mostafa Rohaninejad və “JetBrains” şirkətinin İnsan resursları, tədqiqat və investisiyalar üzrə böyük vitse-prezidenti Andrey İvanov cavablandırıb.
Çıxışlar zamanı spikerlər Azərbaycanın innovasiya və texnologiya sahəsində artan rolunu, ICPC yarışmasının gənclərin inkişafında əhəmiyyətini və Bakıda keçirilən final mərhələsinin beynəlxalq əməkdaşlıqlara verdiyi töhfələri vurğulayıblar.
Qeyd edək ki, 31 avqust – 5 sentyabr tarixlərində Bakı şəhəri Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalına ev sahibliyi edir. Dünyanın ən nüfuzlu proqramlaşdırma yarışlarından biri hesab olunan müsabiqənin finalı “ICPC Foundation” təşkilatçılığı və ADA Universitetinin ev sahibliyi, Azərbaycan Respublikasının Mərkəzi Bankının tərəfdaşlığı, İnovasiya və Rəqəmsal İnkişaf Agentliyi ilə “ICPC Azərbaycan” icmasının birgə əməkdaşlığı, PAŞA Holding-in dəstəyi ilə keçirilir. Dünya finalında 70 ölkədən 140 ali təhsil müəssisəsini təmsil edən komandalar (hər komandada 3 tələbə olmaqla) iştirak edir.
