“digital.leadership” proqramında “Azərbaycanda Rəqəmsal İnkişaf Konsepsiyası” müzakirə edilib.
İnnovasiya və Rəqəmsal İnkişaf Agentliyinin təşəbbüsü ilə keçirilən “digital.leadership” proqramının 17 - 18 aprel tarixlərində növbəti sessiyası baş tutub. Sessiyada 57 dövlət qurumundan 80-dən çox nümayəndə iştirak edib. Proqramın gündəmində mərkəzi mövzu “Azərbaycanda Rəqəmsal İnkişaf Konsepsiyası” olub. İki gün davam edən toplantıda Konsepsiyadan irəli gələn prioritet istiqamətlər təhlil edilib, panel diskussiyaları zamanı dövlət qurumlarının rəyləri səsləndirilib və qurumlar arasında əməkdaşlığın gücləndirilməsi məqsədilə ortaq fəaliyyət planı müzakirə edilib.
Proqramın birinci günündə İRİA-nın sədri Fərid Osmanov açılış nitqi ilə tədbir iştirakçılarını salamlayıb. O bildirib ki, “digital.leadership” proqramının budəfəki sessiyası xüsusi önəm kəsb edir, çünki “Azərbaycanda Rəqəmsal İnkişaf Konsepsiyası” kontekstində keçirilir: ““digital.leadership” dövlət qurumlarının fikir mübadiləsi üçün effektiv əməkdaşlıq platformasına çevrilib. Proqramın bu sessiyasında Konsepsiyada öz əksini tapmış rəqəmsal inkişaf prioritetlərini müzakirə edəcəyik. Vətəndaş, biznes və dövlət kimi hədəf qrupların dayanıqlı rəqəmsal inkişafını təmin edən mexanizmləri müxtəlif qurumların perspektivindən təhlil edəcəyik”.
Tədbirin davamında İRİA-nın sədr müavini Şahin Əliyev çıxış edərək “digital.leadership” proqramının qurumlar arasında əməkdaşlığa verdiyi töhfəni vurğulayıb. O qeyd edib ki, əməkdaşlıq sayəsində ölkəmizdə rəqəmsal hökumət xidmətlərinin keyfiyyəti artırılıb. İnformasiya təhlükəsizliyi və süni intellekt üzrə vacib qanunvericilik layihələrinin qəbul edilməsinə nail olunub. Qurumlar arasında əməkdaşlıq, həmçinin beynəlxalq reytinqlərdə ölkəmizin imicinə müsbət təsir göstərib. Belə ki, Azərbaycan BMT-nin Elektron Hökumətin İnkişafı İndeksi üzrə son hesabatda inkişaf etmiş ölkələrlə bir sırada yer alıb və bu da ölkəmizdə rəqəmsallaşmanın əhəmiyyətli dərəcədə irəlilədiyinin göstəricisidir. Bununla yanaşı, Ş. Əliyev əlavə edib ki, qurumlar arasında əməkdaşlığın gücləndirilməsi növbəti hesabatlarda daha yüksək mövqedə yer almaq üçün mühüm faktor olacaq.
İRİA-nın sədr müavini Rəşad Xalıqov təqdimatında rəqəmsal hökumət məhsulları - “mygov”, “digital.bridge”, “digital.login”, Açıq Məlumatlar Portalı, Rəqəmsal Sənəd Dövriyyəsi və Elektron İştirakçılıq Portalı haqqında ətraflı məlumat verib. O bildirib ki, 2024-cü ildə “mygov”da 3 həyat hadisəsi aktivləşdirilib və daha 8 həyat hadisəsi üzərində fəaliyyət davam etdirilir. Bu həllərin vətəndaş - dövlət münasibətlərində kəsintisiz təması təmin etdiyi və vətəndaş üçün təhlükəsiz mühitdə fərdiləşdirilmiş xidmətləri əlçatan etdiyi vurğulanıb.
Sessiya panel müzakirələri ilə davam edib. Azərbaycan İnternet Forumunun prezidenti Osman Gündüzün moderatorluğu ilə “Sosial sferada rəqəmsallaşma, prioritetlər və çətinliklər” paneli baş tutub. Panel zamanı rəqəmsallaşmanın vətəndaşların həyatına təsiri, bu texnologiya vasitəsilə yaranan imkanlar və çağırışlar müzakirə edilib. İRİA-nın Strateji tərəfdaşlıq və beynəlxalq əməkdaşlıq şöbəsinin müdiri Orxan İsmayılovun moderatoru olduğu ““GovTech” yanaşması və “sandbox” əsasında rəqəmsal xidmətlərin təşkili” panelində startapların innovativ həllərinin hökumət texnologiyalarının inkişafında tətbiqi imkanları üzrə fikir mübadiləsi aparılıb.
Proqramın ikinci günündə müxtəlif dövlət qurumlarının nümayəndələri tərəfindən data əsaslı qərarvermədə texnoloji alətlərin seçilməsi, dünya azərbaycanlılarının interaktiv xəritəsi, diaspor təşkilatlarının mərkəzi portalı və iqtisadiyyatın rəqəmsal rolu mövzularında təqdimatlar edilib. Qurumlar daxilində müvafiq rəqəmsal layihələr və yanaşmalar tədbir iştirakçılarının diqqətinə çatdırılıb.
Qeyd edək ki, “digital.leadership” proqramı rəqəmsal hökumətə sürətli keçidin təmin edilməsini, rəqəmsal hökumət və rəqəmsal innovasiyalar sahəsində beynəlxalq rəqabətliliyin artırılması, rəqəmsal hökumətin inkişafı və təşviqi üzrə dövlət orqanlarının fəaliyyətinin əlaqələndirilməsini təmin etmək, habelə dövlət informasiya ehtiyatları və sistemlərinin formalaşdırılması, inteqrasiyası və effektiv idarə edilməsi sahəsində vahid koordinasiyanı həyata keçirmək məqsədilə keçirilir.
