“digital.login” hesablarının təhlükəsizliyi ikifaktorlu autentifikasiya ilə gücləndirilib.
“digital.login” portalı vətəndaşların 200-dən çox dövlət informasiya sisteminə gücləndirilmiş elektron imzalar vasitəsilə təhlükəsiz və vahid girişini təmin edir. Portala, həmçinin şəxsiyyət vəsiqəsinin FİN kodu ilə daxil olmaq mümkündür. Bu giriş üsulunda aktivləşdirilmiş ikifaktorlu autentifikasiya vətəndaşın öz hesabına girişlərini daha da təhlükəsiz edir. Belə ki, funksiyanın başlıca üstünlüyü “digital.login”ə FİN kodla daxil olan istifadəçinin hesabını kiberhücumlardan qoruyaraq əlavə təhlükəsizlik qatı ilə təmin etməsidir.
Bu funksiyanı aktivləşdirməklə vətəndaş “digital.login” hesabına birdəfəlik kod (OTP kodu) vasitəsilə yalnız özü daxil ola bilir. İkifaktorlu təsdiqləmə hesab girişlərinə tam nəzarəti təmin edir və qanunsuz müdaxilələrin qarşısını alır. Fişinq hücumları zamanı parol oğurlansa belə, ikinci təsdiqləmə kodu hesabın ələ keçirilmə təhlükəsini minimuma endirir və hesabı effektiv şəkildə qoruyur.
İkifaktorlu təsdiqləməni aşağıdakı kimi aktiv etmək mümkündür:
Vətəndaş mobil cihazına "Google Authenticator" və ya "Microsoft Authenticator" tətbiqlərindən birini quraşdırır. Daha sonra “digital.login” hesabına FİN kodla daxil olur və şəxsi kabinetə keçid edir, “Təhlükəsizlik” bölməsini klikləyir və “İki faktorlu autentifikasiya” altbölməsini açır. Cihazına yüklədiyi tətbiqlə veb-səhifədəki QR kodu oxudur və bununla da vətəndaşın “digital.login” hesabında ikifaktorlu təsdiqləmə aktivləşir.
Təsdiqləmənin aktivləşdirilməsi ilə bağlı tez-tez verilən sual və cavablar digital.login.gov.az və İRİA-nın Youtube kanalında yer alır.
Qeyd edək ki, bəzi vətəndaşların öz “digital.login” hesablarına əvvəllər FİN kodla, indi isə əksər hallarda “SİMA İmza” ilə daxil olmasına baxmayaraq, FİN kodla olan giriş üsulu yenə də aktiv qalır. Bu, hesabın təhlükəsizliyi baxımından müəyyən risklər yarada bilər. İstənilən halda hesabın təhlükəsizliyini təmin etmək üçün ikifaktorlu autentifikasiyanın aktivləşdirilməsi məqsədəuyğundur. Bununla yanaşı, vətəndaşlara öz hesablarına daha təkmil təhlükəsizlik mexanizminə malik olan “SİMA İmza” ilə giriş etmələri tövsiyə edilir.
