"digital.login"in istifadəçi sayı 4 milyon oldu
“digital.login” vahid giriş sisteminin istifadəçi sayı 4 milyona qədər yüksəlib. Son bir ildə sistemin təqdim etdiyi imkanlardan faydalanan vətəndaşların sayı 1 milyon artıb. Eyni dövrdə “digital.login”ə 50-dən çox yeni sistem inteqrasiya olunaraq əhatə dairəsi daha da genişləndirilib.
Hazırda vətəndaşlar “digital.login” vasitəsilə 150-dən hökumət portalına rahat və təhlükəsiz şəkildə daxil ola bilirlər. Platforma ilə ən çox ziyarət edilən ilk üç portal arasında Elektron Gömrük Xidmətləri (e-customs), Əmək və Əhalinin Sosial Müdafiəsi Nazirliyinin Mərkəzləşdirilmiş Elektron İnformasiya Sistemi və “mygov” rəqəmsal hökumət portalı yer alır.
Qeyd edək ki, 4 milyonuncu istifadəçi olan Niyaməddin Mamedov, İnnovasiya və Rəqəmsal İnkişaf Agentliyinə(İRİA) dəvət olunaraq təbrik edilib. Görüşdə İRİA-nın məhsul meneceri Ləman Səmədova və “SİMA” Rəqəmsal İmzanın məhsul sahibi Ceyhun Həsənov vətəndaşa “digital.login” sistemi və “SİMA” rəqəmsal imzadan istifadə qaydaları haqqında ətraflı məlumat veriblər.
