Xəbərlər

İnnovasiya və Rəqəmsal İnkişaf Agentliyinin həyata keçirdiyi “mygov Vətəndaş Təcrübəsi Mərkəzi” layihəsi çərçivəsində platforma istifadəçiləri ilə sayca ikinci görüş Gəncə şəhərində keçirilib.

 

Layihənin əsas məqsədi “mygov” platformasının vətəndaşların rəy və təklifləri əsasında təkmilləşdirilməsi, dövlət xidmətlərinin dizayn və inkişaf prosesində istifadəçi təcrübəsinin daha geniş şəkildə nəzərə alınmasıdır. Bu yanaşma vətəndaşların rəqəmsal hökumət proseslərində iştirakçılığını genişləndirir və onları yalnız xidmət istifadəçisi deyil, eyni zamanda xidmətlərin formalaşdırılması və birgə dizaynında iştirak edən tərəfə çevirir. Təşəbbüs “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”nın icrasına uyğun olaraq həyata keçirilir.

 

Gəncə şəhərində keçirilən görüşdə müxtəlif yaş və peşə qruplarını təmsil edən iştirakçılar “mygov” tətbiqindən istifadə təcrübələrini bölüşərək mövcud xidmətlər, sənədlər və platformanın gələcək inkişaf istiqamətləri ilə bağlı fikir və təkliflərini səsləndiriblər. Həmçinin, Azərbaycan Dəmir Yollarının dəstəyi ilə Bakı–Gəncə və əks istiqamətdə hərəkət edən qatar reyslərində də vətəndaşlarla görüşlər təşkil olunub. Müzakirələr interaktiv formatda aparılıb, iştirakçılar gündəlik həyatlarında qarşılaşdıqları ehtiyacları və rəqəmsal dövlət xidmətlərindən gözləntilərini birbaşa ifadə etmək imkanı əldə ediblər.

 

Görüşlər zamanı vətəndaşlar fərdi məlumatların tamlığı, düzgünlüyü və aktuallığının təmin edilməsinin vacibliyini vurğulayıblar. Həmçinin “mygov” platformasında təqdim olunan rəqəmsal sənədlərin istifadəsi ilə bağlı mövcud təcrübələr və gələcək inkişaf imkanları ətrafında fikir mübadiləsi aparılıb. Regionlarda daha çox istifadə olunan dövlət xidmətlərinin platformaya əlavə olunması və maarifləndirmə tədbirlərinin mütəmadi təşkil edilməsi istiqamətində təkliflər də müzakirə olunub. Eyni zamanda proaktiv bildirişlərin genişləndirilməsi, sənədlərin etibarlılıq müddəti başa çatmadan istifadəçilərə avtomatik xatırlatmaların göndərilməsi və cərimə balları ilə bağlı məlumatların daha aydın şəkildə təqdim olunması məsələləri gündəmə gətirilib.

 

Qeyd edək ki, səsləndirilən bütün rəy və təkliflər aidiyyəti üzrə sistemləşdirilərək təhlil ediləcək, “mygov” platformasının müvafiq inkişaf planlarında nəzərə alınacaq.  Əsas hədəf rəqəmsal dövlət xidmətlərinin real istifadəçi ehtiyaclarına əsaslanaraq davamlı şəkildə təkmilləşdirilməsini təmin etməkdir.

 

“mygov” platformasında dövlət xidmətlərinin inkişafı və təkmilləşdirilməsi prosesində iştirak etmək istəyən vətəndaşlar 883 Çağrı Mərkəzi, eləcə də my.gov.az veb saytı  və mobil tətbiqi vasitəsilə öz rəy və təkliflərini təqdim edə bilərlər.

 

mygov" mobil tətbiqini yükləmək üçün keçid:  https://my.gov.az/download-app

 

Tətbiqin son yeniliklərini və xəbərlərini sosial şəbəkələrdə izləyin:

 

- "LinkedIn"

- "Facebook"

- "Instagram"