Xəbərlər

Azərbaycan Respublikası Prezidentinin 22 oktyabr 2026-cı il tarixli Fərmanları ilə rəqəmsal iqtisadiyyatın inkişafının sürətləndirilməsi, texnoloji sahibkarlığın dəstəklənməsi, beynəlxalq rəqəmsal istedadların ölkəyə cəlb edilməsi və innovativ məhsulların dövlət satınalmalarında iştirak imkanlarının genişləndirilməsi istiqamətində qanunvericilik dəyişiklikləri təsdiqlənib. Dəyişikliklər texnopark rezidentliyi, vergi və sosial sığorta güzəştləri, startapların maliyyələşdirilməsi, rəqəmsal səyyahların hüquqi statusu və innovasiya məhsullarının satın alınması mexanizmlərini əhatə edir.

Qanunvericilik dəyişiklikləri barədə ekosistem iştirakçılarının məlumatlandırılması istiqamətində İnnovasiya və Rəqəmsal İnkişaf Agentliyinin (İRİA) təşəbbüsü ilə silsilə maarifləndirici məlumat sessiyalarının keçirilməsi nəzərdə tutulur. Sessiyaların əsas məqsədi yeni dəyişikliklər haqqında məlumatlılıq səviyyəsini artırmaq, onların praktiki tətbiqi ilə bağlı yarana biləcək sual və çətinlikləri müəyyənləşdirmək, eləcə də iştirakçıların suallarını cavablandırmaqdır.

Məlumat sessiyalarına mövcud texnopark rezidentləri və rezidentliyə müraciət etməyi planlaşdıran şirkətlər, startaplar və texnoloji sahibkarlar, İT və rəqəmsal texnologiyalar sahəsində fəaliyyət göstərən şirkətlər, innovativ məhsul və xidmətlər hazırlayan müəssisələr, investorlar və rəqəmsal səyyahlar, eləcə də yeni qanunvericilik dəyişikliklərindən faydalana biləcək digər maraqlı tərəflər dəvət olunur.

Sessiyalarda iştirak etmək üçün uyğun tarixi seçərək əvvəlcədən qeydiyyatdan keçmək mümkündür:

• 4 noyabr, saat 15:00–18:00 — Qeydiyyat üçün müraciət et 

• 13 noyabr, saat 15:00–18:00 — Qeydiyyat üçün müraciət et 

• 18 noyabr, saat 15:00–18:00 — Qeydiyyat üçün müraciət et 

• 26 noyabr, saat 15:00–18:00 — Qeydiyyat üçün müraciət et 

Sessiyalar İnnovasiya və Rəqəmsal İnkişaf Agentliyinin Azərbaycan İnnovasiya Mərkəzində, Bakı şəhəri, Atatürk prospekti 93 ünvanında təqdimat və sual-cavab formatında keçiriləcək.