Xəbərlər

İnnovasiya və Rəqəmsal İnkişaf Agentliyinin bu il əsas tərəfdaşı olduğu “INMerge” İnnovasiya Sammiti 5 000-dən çox iştirakçı, 150 spiker, 100 startap və 80-dən çox vençur fondunu bir araya gətirib. İRİA-nın dəstəyi ilə bu sammitdə investisiya sahəsinə həsr olunmuş mühüm müzakirələr aparılıb və innovasiya ekosisteminin inkişafı üçün vacib addımlar atılıb.

Sammitin birinci günündə Azərbaycanda vençur kapitalı ekosisteminin inkişafı baxımından olduqca əhəmiyyətli qərar verilib. Belə ki, İRİA və “White Hill Capital” vençur fondu arasında yerli startapların maliyyə əlçatanlığını artıran yeni vençur maliyyələşmə şirkəti təsis edilib. Çoxsaylı investorların və ekosistem nümayəndələrinin iştirakı ilə keçən mərasimdə bildirilib ki, əldə edilən razılaşma əsasında “White Hill Capital” vençur fondunun Azərbaycandakı fəaliyyətinin genişlənməsi dəstəklənəcək.

İRİA-nın sədri Fərid Osmanov sammitin ilk günündə “Sənaye və akademik mühit arasında körpünün yaradılması: 4-cü Sənaye İnqilabı üçün insan kapitalı” adlı panel müzakirəsində iştirak edib. Çıxışı zamanı o, İRİA-nın müasir əmək bazarında aktuallığı artan bacarıqların, xüsusilə də ölkəmizin İKT sektorunda kadr potensialının inkişaf etdirilməsi istiqamətində fəaliyyətindən bəhs edib. F. Osmanov bildirib ki, başladılan təhsil layihələrinin əsas keyfiyyət göstəricisi proqram məzunlarının əmək bazarında məşğulluq səviyyəsi, eləcə də məzunların startap quruculuğu sahəsində əldə etdiyi nailiyyətlərdir.

Sammitin ikinci günündə İRİA-nın dəstəyi ilə investisiya mövzusuna həsr olunmuş vertikal öz işinə başlayıb. İRİA-nın İnvestisiya və miqyaslaşma şöbəsinin müdiri vertikalın açılış nitqində Azərbaycanda son illərdə vençur kapitalı üzrə əlçatanlığın təmin edilməsi, xüsusilə İRİA-nın dəstəyi ilə yaradışmış “Caucasus Ventures” fondunun bu istiqamətdə atdığı addımlar və “White Hill Capital” vençur fondu ilə strateji tərəfdaşlıq əsasında təsis edilmiş vençur maliyyələşmə şirkəti haqqında ətraflı məlumat verib. O, startap ekosisteminin inkişafı üçün vençur maliyyə resurslarının əhəmiyyətini vurğulayıb: “İnkişaf etmiş ekosistemlərdə sürətlə böyüyən startaplar məhz vençur kapitalı sayəsində buna nail ola biliblər. Bizim də məqsədimiz ölkəmizdə bu sahənin şaxələnməsi üçün geniş imkanlar yaratmaqdır”.

Gün ərzində investisiya vertikalında regional və qlobal vençur fondlarının nümayəndələri, mələk investorlar, habelə startap təsisçilərinin iştirakı ilə müxtəlif təqdimatlar və panel müzakirələri keçirilib. Diskussiyalar zamanı regional startap ekosistemləri arasında sinerjinin gücləndirilməsi və ölkələrin iqtisadi artımı kontekstində vençur kapitalının rolu vurğulanıb.

Qeyd edək ki, “INMerge” İnnovasiya Sammiti artıq beşinci dəfədir ölkəmizdə keçirilir. Hər il çoxsaylı startaplar, investorlar, tanınmış spikerləri və qlobal şirkətlərin rəhbər şəxslərini bir araya gətirən sammit regionun ən böyük innovasiya sammiti hesab olunur.