Xəbərlər

İnnovasiya və Rəqəmsal İnkişaf Agentliyinin (İRİA) “Plug and Play” ilə tərəfdaşlığı çərçivəsində həyata keçirilən “Openwave Açıq İnnovasiya” proqramı çərçivəsində “Industry Challenge”in növbəti mərhələsinə start verilib. Proqramın “Open Call” mərhələsində Bakı Metropoliteni və Azərbaycan Dəmir Yollarının (ADY) real əməliyyat ehtiyaclarına uyğun innovativ texnoloji həllər axtarılır.

“Industry Challenge” proqramının əvvəlki mərhələsində Bakı Metropoliteni və ADY nümayəndələrinin iştirakı ilə keçirilən görüş və vörkşoplar zamanı qurumların fəaliyyətində texnoloji həllərin tətbiq oluna biləcəyi konkret çağırışlar müəyyənləşdirilib. Hazırkı mərhələdə yerli və xarici startaplar, texnologiya şirkətləri və innovativ həllər təqdim edən digər şirkətlər həmin istiqamətlərə uyğun həllərini təqdim etməyə dəvət olunurlar.

Bakı Metropoliteni üzrə müəyyən edilmiş çağırışlar infrastrukturun idarə edilməsində analitik və texnoloji həllərin tətbiqini əhatə edir. Buraya enerji səmərəliliyinin artırılması, tunellərdə hava axınının modelləşdirilməsi, eləcə də tunel divarlarında su sızmalarının aşkarlanması üzrə həllər daxildir.

Azərbaycan Dəmir Yolları üzrə müəyyən edilmiş çağırışlar isə dəmir yolu xəttində yarana biləcək təhlükə və maneələrin süni intellekt vasitəsilə real vaxt rejimində aşkarlanması və təsnifləşdirilməsinə yönəlib. Təklif edilən həllərin müxtəlif hava şəraitində effektiv işləməsi əsas tələblər sırasındadır.

“Industry Challenge” proqramının yeni mərhələsinin məqsədi texnologiya şirkətlərinin hazırladığı innovativ həlləri real sektorun konkret ehtiyacları ilə əlaqələndirmək və uyğun həllərin real mühitdə sınaqdan keçirilməsinə şərait yaratmaqdır. Seçilən şirkətlər öz həllərini real mühitdə tətbiq etmək və “Konseptin təsdiqi” mərhələsinə keçmək imkanı əldə edəcəklər.

Proqrama yerli və xarici startaplar, texnologiya şirkətləri, eləcə də müvafiq istiqamətlər üzrə innovativ həllər təqdim edən şirkətlər müraciət edə bilər. Müraciətlərin qəbulu 28 sentyabr–9 oktyabr tarixlərində açıq olacaq. Müsahibə mərhələsinin isə 12 oktyabr həftəsindən etibarən başlanması nəzərdə tutulur.

Startaplar bu link vasitəsilə müraciət edə bilər: Qeydiyyat üçün link

Qeyd edək ki, “Industry Challenge” təşəbbüsü dövlət və real sektorun texnoloji ehtiyaclarının innovasiya ekosistemi ilə əlaqələndirilməsinə, perspektivli həllərin pilot layihələr vasitəsilə sınaqdan keçirilməsinə və uğurlu texnologiyaların praktik tətbiqi üçün yeni imkanların yaradılmasına xidmət edir.