“Rəqəmsal Könüllülər”in dəstəyi ilə “mygov” xidmətlərindən istifadə təşviq olunur
İnnovasiya və Rəqəmsal İnkişaf Agentliyinin (İRİA) və “ASAN xidmət”in əməkdaşlığı ilə Bakıda və ölkənin müxtəlif regionlarında “Rəqəmsal Könüllülər” proqramına start verilib.
Proqram “ASAN Könüllüləri” Təşkilatının dəstəyi ilə Bakı şəhərində və regionlarda vətəndaşların “mygov” platformasının imkanları barədə məlumatlılığını artırmaq, rəqəmsal xidmətlərdən istifadəsini təşviq etmək məqsədi daşıyır.
Təşəbbüs çərçivəsində könüllülər “ASAN xidmət” mərkəzlərinə müraciət edən vətəndaşların “mygov” platformasından istifadə vəziyyətini müəyyənləşdirirlər. Platformada qeydiyyatdan keçməyən vətəndaşlara mobil tətbiqin yüklənməsi və qeydiyyat prosesinin tamamlanmasında dəstək göstərir, eyni zamanda, platformanın funksional imkanları, təqdim etdiyi rəqəmsal xidmətlər və istifadə qaydaları barədə ətraflı məlumat verirlər.
Proqramın effektivliyini ölçmək məqsədilə “ASAN xidmət” mərkəzləri və könüllülər üzrə statistik məlumatların monitorinqi aparılır.
Proqram “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı"na əsasən rəqəmsal xidmətlərdən istifadənin təşviqini hədəfləyən “Rəqəmsallaşma üzrə Yol Xəritəsi” çərçivəsində həyata keçirilir. Təşəbbüs ümumilikdə 27 “ASAN xidmət” mərkəzində 230-dan çox könüllünün iştirakı ilə icra olunur. Növbəti mərhələdə region sakinləri ilə görüşlərin keçirilməsi, platformanın təkmilləşdirilməsi prosesində onların rəy və təkliflərinin dinlənilməsi planlaşdırılır.
