Xəbərlər

İnnovasiya və Rəqəmsal İnkişaf Agentliyinin (İRİA) təşəbbüsü ilə 8–9 oktyabr 2026-cı il tarixlərində Şamaxıda “Rəqəmsal liderlik” proqramının növbəti görüşü təşkil olunub. Tədbirdə 40-dan çox qurumdan 50-yə yaxın rəqəmsal idarəetmə üzrə rəhbər şəxsin iştirakı ilə “Azərbaycan Respublikasında rəqəmsal inkişafın sürətləndirilməsinə dair 2026−2028-ci illər üçün Fəaliyyət Planı”ndan irəli gələn prioritet mövzular ətrafında geniş fikir mübadiləsi aparılıb.

Görüş iştirakçılarını açılış nitqi ilə salamlayan İRİA-nın İdarə Heyətinin sədrinin müavini Şahin Əliyev Azərbaycanda rəqəmsal inkişaf sahəsində son illər mühüm irəliləyişin əldə edildiyini bildirib: “Ölkəmizdə dövlət rəhbərliyi səviyyəsində rəqəmsal inkişaf, süni intellekt və kibertəhlükəsizlik istiqamətlərinin hər birini ayrılıqda əhatə edən strateji sənədlər təsdiq edilmişdir. Sözügedən sahələrdə əhəmiyyətli nəticələrə nail olunmuş və bu müsbət dinamika BMT-nin EHİİ, Milli Kibertəhlükəsizlik İndeksi, Qlobal İnnovasiya İndeksi və süni intellekt üzrə “Oxford Insights” kimi beynəlxalq reytinqlərdə ölkəmizin mövqelərinin yaxşılaşmasına  təkan vermişdir”.

Şahin Əliyev, həmçinin, rəqəmsal inkişaf üzrə yaxın illərdə atılacaq konkret addımlar və bu xüsusda “Azərbaycan Respublikasında rəqəmsal inkişafın sürətləndirilməsinə dair 2026−2028-ci illər üçün Fəaliyyət Planı”ndan irəli gələn prioritetləri vurğulayıb. Belə ki, Fəaliyyət Planına uyğun olaraq dövlət qurumları ilə koordinasiyalı şəkildə Rəqəmsal Yol Xəritələri hazırlanmışdır, eləcə də əsas fəaliyyət göstəriciləri (ƏFG), görüləcək tədbirlər və qurumlarda bu sahədən məsul şəxslər müəyyən edilmişdir.

İki gün davam edən proqram ərzində büdcələşmə, ƏFG kartları və indikativ planlama, eləcə də dövlət xidmətlərinin rəqəmsallaşdırılması mövzularını əhatə edən panel müzakirələri baş tutub. İlk panel müzakirəsində strateji sənədlər, Yol Xəritələri, illik planlar, büdcə, ƏFG və indikativ planlama arasında uzlaşmanın təmin edilməsinin vacibliyi, göstəricilərin ilkin mərhələdə düzgün müəyyənləşdirilməsi, baza göstəricilərinin və məlumat mənbələrinin dəqiq göstərilməsinin əhəmiyyəti vurğulanıb.

Növbəti gün baş tutan panel müzakirəsində dövlət xidmətlərinin rəqəmsallaşdırılması mövzusu ətrafında müxtəlif dövlət qurumlarının qabaqcıl təcrübələri, tətbiq olunan yanaşmalar, xidmətlərin inkişaf prioritetləri və mövcud çağırışlar müzakirə edilib, rəqəmsal xidmətlərin daha səmərəli və istifadəçiyönümlü təşkili ilə bağlı təkliflər irəli sürülüb, geniş fikir mübadiləsi aparılıb.

Bununla yanaşı, proqramda “Rəqəmsal məlumat mübadiləsi” altsistemi üzrə dəyişikliklər və onların idarə olunması, “mygov biznes: mövcud vəziyyət və çağırışlar”, “Rəqəmsal inkişaf yolunda hüquqi islahatlar” mövzularında təqdimatlar edilib. Təqdimatlar zamanı rəqəmsal məlumat mübadiləsinin təkmilləşdirilməsi, biznes üçün rəqəmsal xidmətlərin mövcud vəziyyəti, yeni yaradılan imkanlar və inkişaf istiqamətləri, həmçinin rəqəmsal inkişaf, innovasiya, startap ekosistemi, vençur maliyyələşməsinin hüquqi və institusional əsaslarının gücləndirilməsi ilə bağlı qanunvericililik təşəbbüsləri diqqətə çatdırılıb.